‎تۆپەكە بەشوتی كێ و لە كوێ دەتەقێتەوە

ئەمەریكا لەڕووی جیۆسیاسییەوە لە مەنجەڵەكان دوورە، بەڵام لەسەر سفرەكەیە
Thumbnail

‎جیهانی دیموكراسی و مافى مرۆڤ چی بەرهەم هانی ؟ (سیاسییە كلاسیكەكانی سەردەمی ئیمپراتۆرەكان و تەكنۆلۆژیای لەناوبەرو كەمبەهاكردنی ئەوەی هەزاران ساڵە هەزاران كتێبی لەسەر نووسرا بەناوی ئەخلاق)

‎گرێ كوێرەی مرۆڤ لە مرۆڤ بوونەكەی نییە، بەڵكو لە دەستكارى دەسەڵاتدارە بێ گیانەكانییەتی. 
‎ئێستا وەك جاران مرۆڤایەتی لە تەنگژەدا نییە، بەڵكو لە هەڕەشەی لەناوچوون، یاخود دەكرێ بڵێین سەرەتای بوونێكی نوێدایە.
 
‎هێشتا دووكەڵی جەنگی(چڵێسی) لەژێر ناوی ڕزگاریی نیشتیمانیی و ئازادی گەلان و یەكسانی و بە دیموكراسیكردن و ئەو شتانە نەنیشتۆتەوە.
 لە ئان و ساتێكدا زلەكان وەك لەخەوی دوای خواردنەوەی شەرابی هەزار ساڵە قیت بووبنەوە، سفرەی ئاشوبێكی سڕینەوەی مرۆڤایەتیان ڕاخستووە.
 پلەی گەرمی لە سنووری ڕووسیاو ئۆكرانیا لەژێر سفردا دەكوڵێت ، چینیش وەك تیمساح دەمی بۆ قوتدانی نێچیرێكی بچكۆلەی وەك تایوان كردووەتەوە، هێشتا نازانرێت ئایا تایوان وەك كوللة پێكوڕە بۆ نێو كەڵبەكانی چین دەكات، یا تیمساحەكە خۆی خشكەیەكی بەسەردا دەكات ؟

 ئەمەریكا لەڕووی جیۆسیاسییەوە لە مەنجەڵەكان دوورە، بەڵام لەسەر سفرەكەیە، كابانەكانی (رووسیا) ش لە ناندینەكە غایب نین، لەوانەیە ئەوجارە وەك جەنگی جیهانی دووەم بۆ ئەمەریكا(لۆتۆ)ی سەركەوتنی پاك دەرنەچێ، ئەو ئێستا موحەییەرێكی موحریجە، ئەوروپاش لەو پیرەژنە دەچێت كە سەرمای بێ و ترسی نەمانی گاز دەستە پاچەی بەینی كوڕ و بووكە تەڵاق دراوەكەی بێت، پرسیارێك كە هەمووانی كاس كردووە ئەوەیە كێ براوەی ئەم شەڕوشۆڕانە دەبێت؟ 

‎هەرچەندە براوە سەربازییەكان ئاشكران كە ڕووسیا و چینن، 
‎ئاگرەكە سەنتەرەكەی كییف و مۆسكۆ و پەكین و تایپیی نییە دڵی زەوی لە ڕۆژهەڵاتی ناوینە، ئێرە ناوچەی هەوكردنی زەوییە، هەزاران ساڵە چەقی شەڕە، چەرخەكە لە كوێ لێدەدرێ؟ گڕەكە لێرەیە، فتیلەكە لەوێ ئاگر دەگرێ، بەس گاز و نەوتەكە لێرەیە، بۆیە مەترسی هەرە مەزن لە ڕۆژهەڵاتی ناوینە. شەڕی چڵێسیی دەیان شەڕی هەمە چەشنەی چاوەڕواننەكراوی بەدواوەیە.
 زلەكان دوای هەردوو جەنگە جیهانییەكە جەنگی چڵێسییان لەڕێگەی شەڕی بەوەكالەت و دوورخستنەوە لە ئاقاری خۆیان دەستپێكرد، ئەوەی ڕووسیا دەیكات گەڕانەوەیە بۆپێش دوو جەنگەكە هەندێك بەجەنگی سێیەمی جیهان ناوی دەهێنن، بەس من پێموایە ئەوە جەنگی سفری جیهان دەبێت، دوو جەنگەكەی دیكە تێستیان نەكرد بوو لەیەكەوە دەستیان پێكرد، ئەو تەسەلسولە دەبێ چاكبكرێتەوە ڕەنگە ئەو سفرە، سفری زۆر حیسابان بكات، ئەوەش هەڵە گەورەكەیە كە زلەكان بەتەمان بیكەن.

‎ئەوروپا بۆ گازەكە دەستی بەستراوە، ئەمەریكا" شەڕی ئینتیحاری لە ئیختیاردایە، چین دەستی لە ئەقڵی ئەلكترۆنی تایوان گیر دەكات ،توركیا شینی لافاوی قەیسەری نوێ دەگێڕێ و ئیدی چیتر لە ئەستەنبول دڵنیا نیە و لەوانەشە قەتەر و عێراق و هەرێمی كوردستانیش باجی بوونی گازی بەدیلی ڕووسیا بدەن" بەمەش ئێران لەونێوەندە ناكرێ دوورگەیەكی ئارام بێت.

‎سوریا و عێراق و یەمەن دەمێكە هەڕاج كراون ئێران و توركیا لە ڕێوی سەرمابردە دەچن و جاروبار دەم لە تەڵەكە دەخشێنن و دەكشێنەوە

 چینیش وەك شێری تێر بەنیوەڕاكشاوی چاوەڕێی پێوەبوونی هەمووانە، مۆسكۆ لەبەینی عەرشەكەی سۆڤیەت و قەیسەر خەون بە گەڕانەوەیەكی سەدو هەشتا پلەیی دەبینی، دووریش نییە كۆتاییە كارەساتبارەكە هەر لەوێ بڕیاری لەسەر بدرێ،ئەگەر بەو حاڵە بڕوات ئیتر سەركەوتنی مەزن بەكۆتایی مەزن تەواو دەبی.