"(46) ساڵ ئاوێتەی گیانمان بوویت!"


- ساڵی 1975: لە ئێران و ئاوارەیی گەڕایتەوە؛من ئەوسات تەمەنم دە ساڵان بوو کە بۆ تیپی سرودی قوتابخانەی پاشای گەوره هەڵتبژاردم.
- 1976: فێری خۆشەویستیی خاک و نیشتمانت كردم.
- 1977: تیپی موزیكی پاشای گەورەت دامەزراند و، ئامێری (عود)ت خستە باوەشمەوە و پێت گوتم: "ئەوە ئایندەتە ئامانج."
- 1978: لە ڕواندزی مێژووەوه،‌ بەرەو هەولێری باپیرت بردین، تا بە شێوازی ژەنین لەگەڵ تیپەكانی تردا ئاشنا بین.
- 1979: پلەی یەكەممان لەسەر ئاستی عێراق لە شاری (سەماوە)، لەگەڵ چالاكیی قوتابخانەكانی هەولێر بەدەست هێنا وبە شکۆوە گەڕاینەوە ڕواندز.
- 1980: بۆئەوەی لە پەیمانگەی هونەرەجوانەكان وەربگیرێین، بە چلەی هاوین لەگەڵماندا هاتی بۆ بەغدا؛ دواتر (من و چەتۆ و سەید ئەحمەد) لە موسڵ گیرساینەوە.
- 1981: ئەوەی لە ڕواندز لەسەر موزیك فێرببووین، كارێكی كرد كە زانیارییەكانی قۆناغی یەكەمی پەیمانگە هەر هەمووی بۆ ئێمە دووبارە بێت. چەند گەورە بوویت ڕابەری هونەر! هەر لەم ساڵەدا (سیروان و شێرزاد)ت لە كاروانی دووەمدا بۆ پەیمانگەی موسڵ بەڕێ كرد.
- 1982: سێیەمین كاروانی بەهرەدارانت بۆ موسڵ ڕەوانە كرد و (فاڕوق و كارۆخ) گەیشتنە لامان. هەر لەم ساڵەدا خۆمان بۆ بڵاوكردنەوەی بەرهەمی تیپی مۆسیقای پاشای گەورە، ساز و ئامادە كرد.
- 1983: زۆر بە نهێنی و ورەوە پێت گوتم: "دەستنیشانم كردوویت تا ببیت بە ئەندامی یەكێتیی هونەرمەندانی كوردستان لە شاخ. ئای خودایە ئەوسا (نیشتمان) بۆ هەمووان چەند پیرۆز بوو!
- 1984: نۆبەرەی بەرهەم و شاكاری هونەریی تیپی موزیكی پاشای گەورە، چاوی لەنێو ناوەندی هونەریی كوردستاندا هەڵێنا و، جارێكی دیكە ڕواندز تیرۆژی داهێنانی بەركەوتەوە. هەر لەم ساڵەدا نەوەی دووەمی بەهرەداران هاتنە نێو كۆڕی خەباتی هونەری.
- 1985: بە پلەی نایاب لە پەیمانگەی هونەرەجوانەكانی موسڵ دەرچووم و هاتینەوە شار و قۆڵی خزمەتمان لێ هەڵكرد. ئەوە بوو (ئۆركسترای پاشای گەورە) بۆ یەكەمین جار لەسەر ئاستی كوردستان، چەندین بەرهەمی موزیكی جیهانیی، لە هەولێر پێشكەش كرد.
- 1986: گۆرانی و موزیكی تیپی مۆسیقای پاشای گەورە گەیشتە ئێزگەی كوردی لە (بەغدا) و، دواتر لە تەلەفزێۆنی (كەركوك)یش بەگەورەییەوە پێشوازی كراین.
- 1987: بەو دەست و پەنجە زێڕینانەت، سەرجەم بەرهەمە هونەرییەكانت تۆمار كردن. هەر ئەم ساڵەش ئێزگە و تەلەفزیۆنی (موسڵ) باوەشی بۆ كردینەوە.
- 1988: لە گەرمەی (ئەنفال و كیمیابارانی هەڵەبجە)دا، بڕیارێكی مێژوویت دا، بەوەی كە سەرجەم ئەندامانی تیپی مۆسیقای پاشای گەورە بچنە خەباتی شاخ و لەوێدا درێژە بە خەباتی هونەرییان بدەن. دواتر وا بەباش زانرا، كە مانەوە لە شاردا بەرگرییەكی بێوێنەیە لەو سات و سەردەمەدا.
- 1989: بە دەیان شەو بەنهینی و دوور لە چاوی ڕژێمی بەعسەوە، سرود و گۆرانیی خۆڕاگریت بۆ (فاتیمە و كاڵێ و بەكر لەگزی و نەجمەدین غوڵامی) و هونەرمەندانی پێشمەرگە تۆمار كرد و تیپی مۆسیقای پاشای گەورە، چووە قۆناغێكی تری خەباتی سیاسی و هونەرییەوە.
- 1990: بەناچاری و دوای گفتوگۆیەكی گەرم و خوێندنەوەی پێشهاتەكان، پێت گوتین: تەنیا ڕێگا لەبەردەمتاندا ئەوەیە، كە بچنە خزمەتی سەربازی، تا دواتر بتوانن درێژە بە خوێندن بدەن: (من و چەتۆ و سەید ئەحمەد).
- 1991: ڕاپەرین بوو بە مەشخەڵێكی نوێی وەچەرخانی هونەری لەسەرتاسەری كوردستان؛ تۆی ڕابەر و پەروەردەكار و هونەرمەندی بەئەزموون لەنێو جەرگەی ڕووداوەكاندا بوویت.
لەم ساڵەدا، تیپی مۆسیقای پاشای گەورە، وەك یەكەم تیپی دوای ڕاپەڕین، هونەری بەرگری پێشكەش بە جەماوەری ئاوارە و كۆچڕەوە ملیۆنییەكە كرد. ئەوێ ڕۆژێ ئاهەنگەكانی (شوان پەروەر) و (ناسڕی ڕەزازی) عەرشی ڕژێمی بەعسیان دەهەژاند و، ڕواندز بووبوو به هەواری سەركردە و جەماوەری خۆڕاگر و پێشمەرگەی نەبەرد.
- 1992: خەونی لەمێژینەی تۆ بەدی هات: پەرلەمان و حكومەتی هەرێمی كوردستان دامەزران.
- 1993: ئاهەنگی سەركەوتن و خۆڕاگری و نیشتمانپەروەری، دروشم و باوەڕی گەورەی ئێوە بوون مامۆستای گەورەمان. لەم ساڵەدا نەوەی سێیەمی بە‌هرەمەندانی ڕواندز گەیشتنە كاروانی خزمەتی هونەریی موزیك.
- 1994، 1995، 1996: شەڕی ماڵوێرانكەری براكوژی، خەون و خۆزگە و ئێستا و ئایندەی پوكاندەوەولە بار برد! بیرمە بەحەسرەتەوە پێت گوتم: "هونەرمەندی خاوەنهەڵوێست، دەبێت هەمیشە پارێزەری خاك و نیشتمانی خۆی بێت. ناشێت ببێت بە دەستوپێوەندی حیزب." پێت گوتین: "زۆر وریای خۆتان بن؛ هەڵنەخلیسكێن!"
- :1997 پەرتەوازەبوونی هونەرمەندانی تیپی مۆسیقای پاشای گەورە و دابەشبوونیان بەسەر حیزبەكانی كوردستان و، ڕەنگدانەوەی ئینتیمای تەسكی حیزبایەتی لەسەر ڕەوتی كار و چالاكییەكانی تیپ!
ئەمە تۆی زۆر نیگەران كرد و، دەستەڵاتدارانیش درێخیان لە ڕاكێشانی ئەم و ئەودا نەكرد بەلای خۆیاندا.
- 1998: هەوڵ و كۆششی نەپساوی هەندێك لە ئەندامانی خەمخۆری تیپەكە، بۆ ڕاستكردنەوەی باری لاری دۆخەكە و دەست كردنەوە بە چالاكییەكانی تیپی مۆسیقای پاشای گەورە، هیچی وای لێ سەوز نەبوو. چونكە حیزب چووبووە بنكڵێشە و بەداخەوە هەندێك لە ئەندامان هەڵخلیسكان!
- 1999: ئێستاش لەبیرمە لە كۆمەڵەی هونەرەجوانەكان دانیشتبووین؛ پێت گوتین: "دەبێت هەندێك گۆڕانكاریی ڕیشەیی لە تێڕوانینی ئێمە بۆ قۆناغی دوای ڕاپەڕین بكرێت، ئەگەرنا پاشاگەرادانیی هونەریی ڕاماندەماڵێت!"
- 2000: نەوەی چوارەمی منداڵه ‌چاوگە‌شەكانی ڕواندز، بە دەستە و پەنجە و ئامێرەكانیان، گڕوتینێكی گەورەیان بەخشییە هەوڵەكان و، ئاماژەكانیان نامەیەكی كراوە بوون بۆ ئێمەمانان،‌ تا دووبارە بگەڕێنەوە سەر چالاكییەكانمان.
- 2001: دوای (26) ساڵ ئاشنایەتی لەگەڵ ڕۆحی پڕ لە سۆزت، ئەم ساڵە هەستم كرد، كە ئومێدی ئەوەیان لە چنگ دەرهێناویت، كە بتوانین جارێكی دیكە پێكەوە لەژێر چەتری داهێناندا، موزیك بكەینەوە بە ڕەشماڵی هونەری.
- 2002: لەنێو جەنجاڵی ژیان و نەهامەتییەوە، خوێندنەوە و نووسین بۆ ئێوە تاكە هیوای گەیشتن بووە بەو خۆزگانەی لە بوار و ژیانی سۆزداری و ئەڤینییەوە لەدەستت دان مامۆستای گەورەمان.
- 2003: حوكمی بەعس كەوت. لەم ساڵەدا هەستم دەكرد دەتەوێت لە بوارێكی دیكەدا، بە گڕوتینێكی جیاوازتر خزمەتی نەپساوەتان درێژە پێ بدەن. هێندە سادە و خاكەڕا بوویت، هیچ نهێنییەك پەی پێ نەدەبردیت.
- 2004: باش بەبیرمە، ڕۆژێكی ساردوسڕی خەزانی ئەم ساڵە بوو، بە هەردووكمان خەریكی كۆكردنەوەی هەوڵە شكستخواردووەكان بووین، بۆ دووبارە كۆكردنەوەی ئەندامانی تیپی مۆسیقای پاشای گەورە. بۆ دڵدانەوەی تۆی گەورەش هەرچی (بەكرە و كاسێت و ئەرشیفی گۆرانی)، كە هەبوو لە كۆمەڵە، گواستمانەوە ژوورە بێنازەكەتان.
- 2005: وەك ئەحمەدی شاملۆ دەفەرمووێت: "ببورە باران، تۆ هەر دەباریت و ئێمەش پاك نابینەوە!" داخی گرانم! نەمتوانی چاكەی شەونخونی و گیانفیدایتان بدەمەوە و، وەفا بۆ ئەو ماندووبوون و هیلاكییەتان بنوێنم.
- 2006: لەسەر دانانی پەیكەری عومری پڕئەسرینت لەنێو شاردا، خەریكبوو دۆست و خۆشەویستان تەقە لە سێبەری یەكتری بكەن! ئەمەشیان تەنیا بۆ ڕازیكردن و بەدەستهێنانی دڵ و ئافەرینێكی سەرووی خۆیان بوو! بەڵێ! دەیانویست گەورەیی هەنگاوەكانت ڕابگرن. هەزار حەیف!
- 2007: چاوە شەكەت و ماندووەكانت گلەیی ئەوەیان لە گوێچكە پڕ هەستەكانت دەكرد، كە ناتوانن لەو سات و وەختە ناهەموارەدا، فریای هەناسە پاكەكانت بكەون. چ دۆزەخێكە ئەم ژیانە!
- 2008: دەستنووس و هەندێك لەسەرە قەڵەمەكانی كتێبی (هونەر لە ڕواندزێ)ت، لەنێو هەگبە و دەستە پیرۆزەكانتدا، بەگەورەییەوە گەیشتنە نێو دەستە لەرزۆكەكانم و بەتاسەوە لێم وەرگرتیت گەورەم.
- 2009: بۆ كردنەوەی پەیمانگەی هونەرەجوانەكان لە ڕواندز، زۆر بەپەڕۆشەوە پێت گوتم: "بە هەموو توانایەكت، تەنانەت ئەگەر تەنازولیشتان پێ كرا لە هەندێك شت، ئەوا كۆڵ مەدەن و با ئەو پڕۆژەیە سەر بگرێت."
- 2010: گلەیی ئەوەت لێ كردین كە بەها پیرۆزەكانی هونەرمان پێشێل كرد و، نەمانتوانی لەگەڵ یەكتریدا خۆمان لە هەژموونی حیزبەكان ڕزگار بكەین.
- 2011: كە (پەیما‌نگەی هونەرەجوانەكان)ی ڕواندز كەوتە نێو كۆشی شارەوە، تۆ بەگەورەییەوە بەرەوپیری چوویت و تا بە هەموو توانایەكتەوە دەستی بگریت و لەسەر پێی خۆی بوەستێت.
- 2012: ڕێزلێنان و ڕوولێنانت لە شارەكانی تری كوردستان، ئەو ڕاستییە گەورەییەی بیر هێناینەوە، كە تۆ هەردەم بەتەنگ كەلەپور و كەلتوری میللەتەكەتەوە بوویت. چ شانازییەكی گەورەیە!
- 2013: مرۆڤی ڕابەر، هەرگیز لە هەڕەشە و پەراوێزخستن نەترساوە، ئەمە تۆ بوویت كە باكت بە هیچ شتێك نەبوو، چونكە تۆ بەتەنیا موڵكی خۆت و نەتەوەكەت بوویت.
- 2014: وەكو هەڵگری نهێنییەكانی هونەر و مێژوو و بەسەرهاتی جەرگبڕی ڕواندز، زامەكانت قوڵتر و تێڕوانینەكانت وردتر بوون بۆ ئایندە، بۆیە هەمیشە وەك مەرجەعێكی هونەری جێگای متمانەی هەمووان بوویت.
- 2015: لە مانگی چوار ئەم ساڵەدا، كۆمەڵێ نهێنیی گەورەی نێو هونەرتان بۆ باس كردم، كە دواتر وەكو پەند لە ژیانی ڕۆژانەمدا ڕەنگیان دایەوە. ئەمە هەر لە ئێوە چاوەڕوان دەكرا.
- 2016: بەبێ جیاوازی، بەبێ سڵكردنەوە، بەبێ گوێدانە ئەملا و ئەولا، گەیاندنی پەیامی پیرۆزی هونەر و ڕاستگۆیی، لە ڕەوتی كاری هونەری و ئەدەبیدا، تاكە ئاوات و خۆزگەتان بوو.
- 2017: برینە ساڕێژنەبووەكانت لەوەی جارێكی تر، تیپی مۆسیقای پاشای گەورە بەشكۆوە لەسەر شانۆ ببینیتەوە، تا ئەمساڵەش هەر بەسوێ بوون.
- 2018: پێڵوی چاوەكانت، هەستی بیستن و گوێگرتن لە خۆشەویستان، گەورەترین بەربەست بوو لەوەی هەموو خەڵك لە ئاواتەكانت بگات. ئەمە چ ئازارێكی تاقەتپڕوكێنە!
- 2019: لە دەڤەری پڕ میهر و جوانی و خۆشەویستیی خەڵكەوە، كە بە بازاڕی شاردا گوزەرت دەكرد، بەسەرسامییەوە خەڵك لە هەنگاوە پڕ شكۆیەكانت ڕادەمان و خۆزگەیان بەو ژیانە پڕ بە بەرپرسیارییەتەدا دەخواست!
- 2020: ئەوەی لە مرۆڤێكی (83) ساڵیدا بەدیم كرد، ئەو گەشبینییە بوو، كاتێك كتێبێكی تازە چاپكراوی هونەریم بۆ دەهێنایت، بەتاسەوە وەرتدەگرت و بەئەسپایی پێت دەگوتم: "خەمت نەبێت ئامانج، بە زەڕەبینەكەم دەیخوێنمەوە!"
- 2021: كێ دەیزانی تراژیدیای مەرگ، لە كۆتایی ڕۆژەكانی ئەم ساڵەدا، فریشتەیەك لە جاڕدانی بانگی هونەر و داهێنان و كتێب و شانۆ و موزیك و شێوەكاری و كارامەییدا كپ دەكات و بە گەروی پڕ    تاریكی ژیندا دەیبات؟!
دڵنیا بە ڕابەری هونەر لە ڕواندزێ، ئەم پانۆرامایە ناوەستێت و هەموو ساتێك تۆ لێرە سەرقافڵەی هونەریت و ئێمەش قوتابیی بەوەفات.
ئامانج غازى 
ڕواندز 
کۆتاڕۆژەکانی2021